भजनी - अभंग २६७४ ते २६७५

२६७४

आहारालागीं करी देवाचें भजन । मिळे मिष्ठान्न भोजनासी ॥१॥

आहारालागीं करी तीर्थांचे भ्रमण । आहारें जिंकिलें मन सर्वपरी ॥२॥

आहारालागीं करी तीर्थप्रदक्षणा । आहारें व्यापिलें जनां एकमय ॥३॥

आहार निर्धार नाहीं जनार्दनीं । एका जनार्दनीं निराहार ॥४॥

२६७५

बैसोनी एकान्ती । सांगती कोरड्या त्या गोष्टी ॥१॥

म्हणती करा रे भजन । आपण नेणें जैसा श्वान ॥२॥

म्हणे करा पंढरीची वारी । आपण हिंडे दारोदारी ॥३॥

ऐशियाचा उपदेश । एका जनार्दनें म्हणे नाश ॥४॥