तें दूध तुझ्या त्या घटांतलें

तें दूध तुझ्या त्या घटांतलें

कां अधिक गोड लागे न कळे. ध्रु०

साईहुनि मउमउ बोटें तीं

झुरुमुरु झुरुमुरु धार काढिती,

रुणझुणु कंकण करिती गीती,

का गान मनांतिल त्यांत मिळे ? १

अंधुक शामल वेळ, टेकडी,

झरा, शेत, तरु, मधें झोपडी,

त्यांची देवी धारहि काढी,

का स्वप्नभूमि बिंबुनी मिसळे ? २

त्या दृश्याचा मोह अनावर

पाय ओढुनी आणी सत्वर,

जादु येथची पसरे मजवर,

का दूध गोडही त्याचमुळें ? ३