माझ्या ग अंगणात थवे फु...

माझ्या ग अंगणात

थवे फुलपाखरांचे

गोल गोल रिंगणात

गाणे फिरते रंगांचे

माझ्या ग अंगणात

पंख फिरकती तयांचे

लाल-गुलाबी फुलांत

ध्यान चालले निळ्याचे

माझ्या ग अंगणात

वेल निळे गोकर्णीचे

गर्द पोपटी पानांत

झुले झुंबर पंखांचे

माझ्या ग अंगणात

मिटे पंख पाखरांचे

हळू जाता धरु हात

पंख फाटती त्यांचे

अशा माझ्या अंगणात

रंग सांडले फुलांचे

फुलपंखी मंडपात

रंग थवे पाखरांचे